心心朱古力批 (酥)

 

 

今日做左呢個 ....

" 心心朱古力批 (酥) "

比 marcus & chloe 當下午茶,

又留左 d 比 marcus 聽日攞返學校做小食 ...

 

 

其實係想整 lemon tart or 焦糖 muffin 的,

但見到包酥皮就黎到期,

咁就用左佢先啦 .... 

本想整鹹味酥點,

但當 "碌" 個酥皮時, 又想整甜味酥點 wor, 所以 ...

即刻搵下有咩材料可以整啦,

諗過用果醬, 但最後都係用左朱古力 ...

 

 

 

 

 

 

深圳一天遊之 "食"

 

 

2009年3月28日 ...

我地今日行完 "廚安居" 之後就去左呢度食 lunch ...

"豬肚雞" ...

我地都冇周圍去搵野食, 因為都冇準備嘛...

見呢間 "豬肚雞" 都好企理, 所以就呢間啦,

呢間 "豬肚雞" 都有好多分店架,

仲可以打邊爐 tim ...

 

我地叫左一個套餐加一煲 "臘味煲仔飯"

個套餐即係雞 + 翅

 

一隻 "豬肚雞" 加一碟翅 (佢話有一斤)

隻雞好大隻,

個湯底係滾住架, 滾起後就放入雞和翅,

好好味 ....

個 "臘味煲仔飯" 又係好得, 好大煲架, 唔同香港果 d

我地 7 個人, 都分到 12碗飯

好入味之餘仲有好多飯焦, 可惜唔記得影相 ...

 

 

行完書城, 我地去左呢間食晚飯 ...

" 大漁鐵板燒 "

呢間 "大漁" 好多人都去過, 口碑都唔錯

係任食鐵板燒, 都好多食物選擇, 連飲品都係任叫 ...

又唔駛自己動手, 只需要落 order

師博就會幫你燒埋, 燒好後就送到你面前,

你仲可以見到師傅即場喺度燒....

呢張就係我地坐果張枱喇, 亦可以唔揀坐鐵板燒枱,

坐出面的座位, 冇咁迫 ...

我地今次食呢間 "大漁" 係喺中信廣場呢間分店 ...

RMB150 一個大人, 係抵食嘅, 食物大部份都幾好味,

不過食到咁上下, 都有少少漏的感覺,

可能佢全部食物都係用牛油燒吧 ...

另外, 負責我地果張枱個師父喺" 燒牛" 果方面就一般喇,

d 牛燒得麻麻地, 熟左 d ...

呢個凍清酒樽幾得意 ...

我地食 5:30, 第一輪, 8:20 就要交枱 ...

坐低冇幾耐已經好快坐滿人,

走果陣有好多人企喺門口等位呀 ...

3個小朋友一齊影張相先啦 ....

 

食完晚飯就返香港喇 ....

深圳一天遊之 "行"

 

 

2009年3月28日 ...

我地今日一家人和 Ruby 一家人上了深圳一日

因為今日倆家人的小朋友都不用上課外活動,

所以決定上深圳一日行下, 食下 ...

因為都決定得比較急,

好彩上深圳都好方便, 只要 check 清楚 d 証件

有冇過期, 如果冇過期的話,

便可以隨時成行 ...

 

我地今日去左 2 個地方行,

一個係 "廚安居", 另一個就係 "書城"

 "廚安居" ... 成日都聽見人講去呢度行下, 買野咁

因為貨品齊, 價錢平;

 但因為佢喺國內, 加上太多人講 "東門" 都比較複雜,

daddy 係唔會放心我自己上去的,

所以遲遲都冇上去行下, 見識下 ....

見今日黎深圳, 又有 daddy 陪, 一於去見識下啦 ....

 

 "廚安居" 都好容易去,

我地去到深圳火車站後再坐巴士, 好快就去到,

喺呢間火車站大酒店嘅對面就係巴士站 ...

 

樓高 4 層的 "廚安局" 真係有好多野賣,

只要係屬於廚房嘅用具,

無論是大至酒樓廚房用的, 酒店 buffet 用的....

 小至一般家庭式烘焙用具,

佢地都會供應,

我同 Ruby 一去到, 當然即刻去睇下 d 家庭式烘焙用具啦,

2 個老公加埋 3 個小朋友都有周圍行下, 睇下架,

marcus 同 chloe 仲一路睇一路話 :

媽咪, 呢個我地屋企都有呀,

媽咪, 呢個大過我地屋企果 d 嘅, 等等等等 ......

但就係因為有老公同埋小朋友一齊行,

所以都唔係行左好耐就要走喇,

因為 d 小朋友嗌肚餓呀 .... 

其實呢度係唔比影相架, 我偷偷地影左幾張 ...

 "廚安居" 內的貨品真係好多, 諗到諗唔到嘅都會有得賣,

佢地話佢地係一站式服務 ....

不過, 我發覺有 d 貨品同香港價錢差唔多 ...

 

食完 lunch 後, 我地就去左 "科學館站" 的書城

呢個書城好容易去, 坐地鐵去到 " 科學館站"

搵 B 出口, 一出就係 ...

 

不過今日時間唔係好夠, marcus & chloe 都冇收穫,

daddy 應承左佢地遲 d 搵日再黎書城,

逗留耐 d, 睇下有冇收獲啦 ....

 

我今日喺 "廚安居" 的收穫, 用左 RMB150.00 左右,

( 我買果 d,  記憶中係平過喺香港買嘅 ...

 )

除左一般烘焙用具之外,

仲買左個蒸籠, 可以玩下整中式點心,

買到個整 "果汁軟糖" 的模喇, 喺香港搵唔到咁細粒的模,

我數過, 有成 97粒架 ....

因為唔記得帶環保袋, 比左 RMB 3毫子買一個膠袋 ...

今日喺東門/東門附近所影的相 ....

"東門" 係一個購物區同埋好多食市的地區,

 好多香港人都上黎行下, 食下, 遊下 ...

 經常見到的流動 "士多" ...

雙層巴士

大部份香港有的連鎖店, 深圳都有 ...

可能今日係星期六, 好塞車呀, 呢個情景,

我諗起灣仔稅務大樓每逢星期六下午都會塞車的畫面

見到有人曬蝦乾, 不過 d 蝦好大隻架,

可以用黎整茄汁蝦碌呀

 

 chloe 好少可去街行行下話眼訓,

但今日行行下, 佢話好眼訓,

於是, 當然係 daddy 抱住訓啦 ...