Marcus - 11年的點滴

 

之前喺 Marcus 11歲生日果篇 blog 講過 ...

我有好多野想寫 ...

趁前 2 日 (09年5月22日) 幫 Marcus 申請兒童身分證,

( 攞兒童身分證, 又係另一個階段喇 ... )

我今日寫左呢篇 : Marcus - 11年的點滴

但真係太多, 只寫了一些印象較深的 ...

 

 

11年,  眨下眼就過 ...

記得有一次,  Marcus大約 3/4歲吧,

我見佢喺廳中間不停圓圈咁跑,

我仲諗, 係咪好似 d 戲劇, 跑幾個圈已經變得大個 ...

原來, 時間真係過得好快架 ...

 

 

Marcus ...

我仲記得生你果日的情景, 媽咪用左大約 20個鐘,

你先肯出黎同我地見面, 真係搞到我同 daddy 身心疲累呀

喺呢 20 個小時內發生的事, 我同 daddy 都唔會忘記 ...

因為真係好難忘, 有 d 又好搞笑  

 

 

 

當你出院後, 媽咪又太緊張 ...

試過一次, 你因為個奶咀問題啜唔到奶,

媽咪喊左出黎呀, 好彩冇產後抑鬱症

又驚你會肚餓, 怕自己半夜唔知醒,

較定每 4個小時的鬧鐘, 提自己起身開奶比你食,

事後仲比婆婆笑我, 婆婆話 bb 肚餓就會喊,

到時你一定會比佢 d 喊聲嘈醒啦

你亦都算乖, 唔駛一個月, 已經介左夜奶 ...

 

 

因為公司倒閉 ...

我因為唔捨得你, 所以都唔上心搵返份新工

喺唔急於搵工的情況下, 我都湊左你成年

但始終覺得自己咁後生就返屋企湊仔

好似有 d 可惜, 所以最後決定再返工 ...

但因為 daddy 唔讚成請工人湊 bb

所以最終決定將你比嫲嫲湊 ...

仲記得放低你喺嫲嫲屋企當晚

我遲遲唔想離開, 想見多你幾面

(其實之後我除左 weekend 湊返你,

媽咪隔晚都去嫲嫲家睇你架 ...)

但始終都要離開喇, 我一踏出嫲嫲家,

我的眼淚已經忍唔住不停咁流落黎,

就算 daddy 點樣安慰我, 我都係咁喊, 喊左2/3個鐘 ...

因為真係唔捨得, 唔捨得, 一千萬個唔捨得

要過一段時間, 我先適應到 ...

但原來, 將你比嫲嫲湊, 對你,

都成為一個唔係幾開心的回憶 ...

當然, 爺爺嫲嫲, 叔叔姑姐都好錫你,

但當你大個 d 識表達時, 你話我知每次當

媽咪 daddy 走左之後, 你都會喊呢

當 chloe 出世後, 你耐唔耐就會問我 :

點解 chloe 唔駛去嫲嫲度住嘅, 我就要住幾年 ?????

我每次聽到你咁問, 我都會同你解釋,

因為 daddy 媽咪怕工人姐姐會欺負你,

但你始終都會耐唔耐就問住,

 我個心聽到都會有 d "拿" 住 ....

因為你好多的第一次, 媽咪都唔係第一個睇到 ...

 

 

 

又記得你入讀幼稚園 k1時, 第一次上台表演

我同 daddy 不知幾開心, 見你出場時,

眼淺嘅我當然又係眼濕濕啦 ...

之後每次見你上台攞獎, 媽咪 daddy 都好開心 ...

有一次, 你讀緊 k2, 你冇得我同意就偷偷帶你心愛

的比卡超公仔返學校,

到你訓覺時, 我見你喊得好犀利,

原來比卡超公仔唔見左, 你好掛住佢,

但你又唔敢同我講, 只係不停喺度喊 ...

我知道件事後, 我冇責怪你, 仲教識你下次唔可以咁做

好彩我同班主任講左之後,

班主任喺你張枱個櫃筒最入果度搵返 ...

 

 

讀書方面, 由細到大, 你都算 ok ...

 每次考試都算考到幾好的成績

不過, 隨住你日漸成長, 外界誘惑對你相對亦變多

媽咪當然希望你可以更好, 至少都要 keep 住

所以我都會提住你溫書, 我變相 "囉唆" 了 ..

touch wood, 你都仲算聽話 ...

 

 

你的志願 : 你同我講過好多你的志願,

警察啦, 消防員啦, , 飛機師啦, 廚師啦等等等等 ...

不過你而家嘅志願, 我希望你真係會實現啦 ....   

 

  

 

未有 chloe 之前, 我記得你每晚求天父爸爸賜一個

細佬或者細妹比你, 你個樣好誠心 ... 

chloe 出世後, 你覺得 chloe 好可愛, 好錫佢

成日要我比你抱 ...

不過隨住 chloe 漸漸大個, 識同你爭野, 又同你鬥咀,  

有時佢又唔聽你話, 你會覺得好激氣

但我見你倆個, 好多時又好好感情 ...

你同我講, 你個心裡面都係錫 chloe 的 ...

 

 

 

好多人都讚你乖, 媽咪都認同嘅 ...

因為你都算係一個聽教聽話的小朋友 ...

不過有時你都會激到我 c c 下架 ....

但我諗大部份的小朋友都會係咁 ...

只希望你唔會學壞就可以喇 ...

 

 

我記得你好細個時同我講過一句話 ...

媽咪,  我大個會請你去 Starbucks 飲下午茶,

我當時聽到真係心都甜哂 ....  

不過, daddy 媽咪只希望你以後

日日都開開心心, 身體健康就足夠喇 ...