今日整左呢個甜品 ...
" 士多啤梨芝士酥 "
我記得呢個甜品我一見到已經好想整
仲揸住本甜品書唔想放低
最後 ... 呢本書, daddy 買左比我
但係買左呢本書起碼有大半年
到今日先整左呢個甜品出黎 ...
又真係唔錯, 我今日用左有鹽牛油
所以個芝士酥有 d 鹹鹹地,
不過配埋甜甜的吉士醬同埋士多啤梨
真係幾好味架 ...
2009年6月28日 星期日
游水仲要停 + 藍莓布甸 ....
2009年6月27日 (sat)
marcus 游水的泳池因為係屬於 st. paul 中,小學部
泳會通知今個星期都仲係要停 ...
不過依然都會去 brian 度
可以去 brian 度, marcus 好開心,
佢話游水已經冇得游, 如果連 brian 果度都冇得去
佢話就真係好悶 wor ...
見屋企仲有用淨的藍莓醬
本來想整藍莓 cheese bar
點知屋企又冇哂 cream cheese
所以整左呢個 ....
" 藍莓布甸 "
點知趕住出街, 個布甸糊竟然唔記得左落糖
諗住個藍莓醬有糖都 ok 啦,
原來都係唔夠甜 ...
2009年6月25日 星期四
好多對鞋呀 !!!
因為聽日 marcus 要返學校考埋小五呈分試
最後一科 G.S., 好喇, 考埋佢
放假都放得開心 d ...
我同 chloe 講, 你今日要乖, 唔好嘈住哥哥溫書
雖然佢耐唔耐都唔記得,
不過佢今日都算乖, 唔係太搞住哥哥
又話等埋哥哥先睇卡通 DVD
chloe 今日下午喺度自己玩 barbie
將 barbie d 鞋排哂喺地下
我見咁得意, 我同 chloe 一齊夾手夾腳將
所有 barbie d 鞋一對對咁排哂出黎影張相 
原來有成34對鞋 
仲有幾隻就唔知玩左去邊, 得返一隻
34對鞋 .... 多過我最高峰果陣好多呀
其實呢 d barbie 鞋唔係我買比 chloe 的,
我從來都冇買過有關 barbie 公仔比 chloe玩,
因為我自己以前唔係好鐘意 barbie
而 chloe 一直又冇話要買黎玩 ...
不過真係要多謝 auntie karen & 大 chloe 姐姐
佢地喺半年前送左差唔多一袋細紅白藍膠袋嘅
barbie 比 chloe 玩, 裡面有3個 barbie 公仔,
同埋好多衫仔, 鞋仔, accessories, 屋, 車等等,
全部都好新淨, 真係有排玩 .....
最好笑係我陪 chloe 玩時,
我都覺得幾好玩 wor 
仲有一盒新 barbie, 未拆盒, chloe 話想拆開黎玩
我見有咁多喺度唔好拆住啦,
見個盒面寫住話 over 6歲先好玩, 咁我咪同 chloe 講
要 6 歲先玩得架, 你過多 2 年先開黎玩啦,
點知 ... marcus 話 :
係呀, 要大個先玩得架, 好似媽咪咁大個先玩得架,
其實 marcus 係笑我都鐘意玩咋, 呢個仔吖, 笑我
影相果陣, chloe 仲問我係咪要影埋 d 衫呀 ?
我話 .... 下次, 下次先啦
麻香皮蛋凍豆腐 / 冬瓜豆卜燜火腩 / 莞茜皮蛋魚片湯
2009年6月23日 (tue)
今日政府宣佈 .....
因為 "人類豬流感", 小學, 幼稚園, 幼兒園
提早放暑假, 其實見每日感染個案都有雙位數字,
都預左唔會復課, 都好嘅, 安全 d ...
今晚都係整左個簡單晚餐 ....
" 麻香皮蛋凍豆腐 / 冬瓜豆卜燜火腩 / 莞茜皮蛋魚片湯 "
" 麻香皮蛋凍豆腐 "
今次用左 "丘比" 嘅芝麻沙律汁, 好味 ...
" 冬瓜豆卜燜火腩 "
夏天食冬瓜好似清涼 d ? ....
" 莞茜皮蛋魚片湯 "
咁熱, 喉嚨又未好返哂, 飲佢下下火 ...
煙三文魚, 煙肉, 蕃茄, 生菜配 ciabatta
2009年6月22日 (mon)
天氣熱, 都唔想晚晚煮飯,
今晚轉下口味, 食三文治 ...
" 煙三文魚, 煙肉, 蕃茄, 洋蔥, 生菜配 ciabatta "
以前喺 cwb 返工, 有間 Pret a Manxxx
有時都會喺佢度買三文冶食
又或者會喺附近的專賣三文冶店買三文冶當 lunch
其實材料最緊要新鮮, 自己整一 d 都冇問題,
佢地都話好味 ...
今晚冇煮個西湯, 只煲左 ...
" 蕃茄薯仔洋蔥碎牛肉湯 "
亦準備了一大碗沙律,
簡簡單單又一餐 ....
訂閱：
文章 (Atom)