咁熱嘅天氣,
最好又係整凍飲 ...
個古董真係一個好幫手
上星期同班朋友去食飯時, 有雪糕做甜品
我叫左個 "朱古力雪糕"
好香同埋好濃嘅朱古力味, 仲有朱古力碎粒
最重要係唔太甜, 好好食 ...
就係咁 ...
自己整左個關於朱古力嘅特飲 ...
" 香蕉朱古力雪糕特飲 "
可能個個都鐘意朱古力, 佢地都話好味 ...
譜譜 :
材料 : 鮮奶大半杯, 香蕉半隻, 朱古力雪糕 1 杯 (雀巢果種), 冰粒適量
做法 : 1) 將所有材放攪拌機打至雪糕完全溶化
2) 將凍飲倒進杯內, 灑上可可粉便可
2009年7月6日 (mon)
天氣一唔落雨, 真係熱得要命
知道聽日要出街, 下午就喺屋企做下家務
執下, 抺下, 比 marcus 叫幾下, 比 chloe 叫幾下,
又一個下午 ...
今日的晚餐 ...
"蕃茄魚塊羹 / 蜜糖甜椒炒鴨胸 / 蒜汁芋絲墨魚仔伴豆腐"
蕃茄魚塊羹 ... 呢個好開胃, 酸酸甜甜咁
蜜糖甜椒炒鴨胸 ...
呢個用蜜糖煮, 甜甜地加埋黃椒紅椒, 又係開胃餸
蒜汁芋絲墨魚仔伴豆腐 ...
呢個我係偷天仙個 idea, 自己改左小小
我用左大半個蒜頭整左蒜茸煮個汁, 小小辣辣地,
不過好香蒜味 ...
食譜來自天仙 (自己改左少少)
材料︰
墨魚仔適量 (我喺 pk 買, 已經清理好哂), 芋絲 1 盒, 四方豆腐 1 件, 大半個蒜頭整成蒜茸, 黑胡麻油半茶匙
獻汁料︰
凍水 2 湯匙, 鹽, 粟粉各半茶匙, 生抽半湯匙, 胡椒粉少少
做法︰
1. 豆腐先蒸熟, 隔去水份, 備用
2. 芋絲和墨魚仔洗淨, 瀝乾水份, 墨魚仔與芋絲 梅花 "簡" 竹放碟上
3. 再放已隔水的豆腐在碟中間, 放熱水上蒸 5-8 分鐘, 取出, 瀘出汁液, 保溫
4. 燒熱鑊，下墨魚汁液煮滾, 落獻汁拌勻, 再加蒜茸拌勻, 煮至濃稠適中, 熄火, 下黑胡
麻油, 淋在豆腐, 墨魚和芋絲上便可
2009年7月5日 (sun)
前 2 日都出左街, 一出就出左成日,
今日訓到好晏, 差唔多成 12:00 先起身
冇幾耐已經見到落好大落雨
星期日落雨真係好冇 mood
而家 chloe 每個星期日的 2:00 - 3:00 都要採排,
直至 8 月中, 所以星期日 d 時間唔係咁好用,
反正 marcus 前日去游水時又割親隻腳板底
所以今日都係留左喺屋企, 冇周圍去 ...
平時假日唔煮飯嘅我, 今日竟然落廚 ....
整左個西餐做 dinner,
因為 daddy 話想食 pizza
就係咁, 今晚焗左個厚批 pizza
材料有 : 粟米, 菠蘿, 青椒, 蟹柳 ....
第一次整厚批, 我用返之前整薄 pizza 個譜,
但份量就自己恩返多 d ...
又整左個 " 牛油帶子蝦配墨汁意粉 "
墨汁意粉我好鐘意食, 好多時出街食飯
我都會叫黎食, 之前喺 sogo 買左一筒,
見今晚食 pizza, 就整個意粉食 ...
個意粉我只用牛油, 蒜蓉炒, 都幾香,
再用牛油煎香帶子同蝦放面 ...
不過, chloe 話點解 d 意粉黑蚊蚊嘅 ?
佢唔想食 wor, 終於, 佢都係食左半碟仔意粉 + pizza
2009年7月6日 (mon)
今日煲左呢個糖水消下暑 ...
" 綠豆馬蹄露 "
好耐冇煲過喇, 未結婚時, 媽咪成日煲, 好好味架 ...
結左婚後, 有時返媽咪屋企, 佢都會煲比我地食 ...
今次自己煲, 又係煲到 d 開邊綠豆溶哂,
個口感好粉好沙, 而 d 馬蹄就好爽口,
呢個糖水真係好正, daddy 話好食過出面街買呀
綠豆馬蹄露食譜 :
材料 : 開邊綠豆 4 兩, 水半煲少 d (自己恩, 因為每個人用嘅煲 size 唔同, 我個煲係 20
cm), 馬蹄 10粒 (切碎/細粒) , 冰糖適量
做法 : 1) 開邊綠豆用水浸 1.5 小時左右
2) 凍水和開邊綠豆一齊煲滾, 轉細火再煲大半小時或開邊綠豆至腍, 起沙, 落馬蹄粒
3) 待再滾起後落冰糖調味至自己覺得個甜味 ok
4) 加生粉水, 直至自己覺得個 "杰" 度 ok 便成 ....
2009年7月2日 (thur)
今日返左 marcus 學校攞 p.5 最後一個學期成績表
和見見班主任 ...
原本p.5 最後一個學期的成績表係唔需要見班主任的
但因為 "豬流感" 的關係
小學停課了, 學生們唔需要返學,
所以最後一個學期的成績表就由家長回學校攞 ...
順便做埋註冊手續, 訂購書本等等 ...
今次呢個試係 p.5 呈分試,
我諗好多家長都會比較緊張,
我都唔例外, 考試期間都有小小唔識形容嘅緊張 ...
上 2 個學期的考試, 我完全冇幫 marcus 溫習
睇下佢個能力去到邊,
但今次呢個呈分試, 會影響佢將來個前途,
所以, 我都唔敢好似上 2 次考試咁大膽, 理都唔理 ...
今次, 當佢自己溫習完, 再做返 d SP 時,
我都會 check 下佢做成點 ...
今次個成績, 我同 daddy 都幾滿意 ...
全班 (42人) 考 3-5名 (班主任係唔會講個名次的)
呈分試個成績係全級 (16x人) 考 6-10名 ...
班主任話個成績好好, 所以一定要 keep 住,
當然再考高 d 名次就會更好...
marcus 今年做左 monitor & librarian
所以班主任有 2 份禮物送比佢 ...
marcus, 你真係要 keep 住努力呀 .....
2009年6月29日 (mon)
今日收到一份由遠方送來的包裹 ...
係 blog 友 "馮姑娘" 送給我, marcus & chloe 的
其實我已經婉拒了馮姑娘一次,
但馮姑娘真係一個好有心, 好 nice, 好 sweet 的人 ...
我同佢只係從 "blog" 上認識, 又素未謀面
仲要我地係天各一方 ...
所以收到呢一份窩心的禮物, 真係令我覺得好感動
原本馮姑娘話有小禮物送比 marcus & chloe
冇諗過原來我都有份,
真係要多謝馮姑娘咁錫我地 ...
馮姑娘送比 marcus & chloe 的禮物 ...
chloe 一見到本 memo 簿仔就同我講 :
媽咪, 有我個名呀 ....
係喎, 馮姑娘好有心, 送左本印有
" A note from Chloe" 的 memo 簿仔比 chloe ...
馮姑娘 )))))
chloe 寫左張 " Thank you 馮姑娘 " 的 memo 比你呀 ...
我又幫 chloe 戴上左條圍群仔比你睇,
你係咪想佢好似我咁為食, 咁鐘意整野食呀 ?
marcus 都話多謝 auntie xxxxx 呀 ...
馮姑娘送比我 for 整野食時用的用品 ...
馮姑娘, 你幾時返香港呀? 又或者好快有一日,
我飛過黎探你地一家, 到時我地一齊整野食吖 ....
