今日晚餐 ....
" 玫瑰蔥油扒雞 / 麵豉醬蒸馬頭 / 油菜 "
再加
" 主席自家制的薑醋 "
見過 blog 友 T & P 整 " 玫瑰蔥油扒雞 "
好想自己整黎食 ...
T & P 用左雞脾, arm 哂我啦,
因為我好怕見到成隻未熟的雞呢
因為都想比 chloe 食 d, 所以我加左半杯水左右
我仲放左 d 香芹喺雞面, 好好食呀 ....
marcus 仲話下次要加多一隻雞脾 wor
(多謝 T & P 的食譜)
" 麵豉醬蒸馬頭 "
琴日講過今日再見馬頭就會買黎食,
今朝又見到喇,
聽買魚果個婆婆講, "馬頭" 又叫 "青根"
(唔知係唔係呢個"根"字 呢 ?)
我用左麵鼓醬蒸, 唔錯唔錯 ...
仲有我放左好多蔥粒 ...
不過未蒸的馬頭個樣好似唔開心咁嘅
" 主席自家制的薑醋 "
今日晚餐 ...
" 糖醋排骨 / 白灼蝦 / 青紅蘿蔔煲豬骨 / 酸齋 "
上次整 " 糖醋排骨 " 時, 用左腩排,
但肉檔 e e 斬得比較細條,
加上煮後縮一縮,
煮完出黎個樣有 d 似五花腩呀
今日再整, 我用左整金沙骨果部份,
似樣好多喇, 味道一樣好味,
個面都係脆架 ....
daddy 話要添飯呀
fian, 我加左個食譜喇, 你都試下整啦 ....
" 白灼蝦 "
原本諗住買馬頭魚蒸,
上午去街市時都仲見有好多,
但下午去完街再去街市時, 果陣 4 點零鐘左右啦
魚檔 e e 話已經賣哂喇,
原來咁好賣架, 聽日見到要買黎食先 ...
見到有 "赤米", $20 一大盤,
所以就整左個 " 白灼蝦 "
仲自家製左個辣椒油來 "點",
唔記得將 d 蔥撕到彎彎地 tim 
" 青紅蘿蔔蜜棗煲豬骨 "
好鐘意食軟骨, 基本上任何軟骨都鐘意食
出開街, 喺齋舖買左個酸齋食, 仲加左小小齋鴨腎,
好好味 .... 我自己都係鐘意食橙色酸齋多 d 
我記得以前有個同事個 99, 自己整酸齋,
味道都好似架, 我諗上網都可能搵到食譜做 ...
糖醋排骨食譜 :
材料：排骨 1磅 蒜蓉, 薑, 乾蔥頭 (全部適量)
調味料：
鎮江醋 3湯匙
片糖 1 片
老抽 1.5湯匙
生抽 2湯匙
紹酒 2湯匙
麻油少許
水 3/4杯
製法：
1. 起鑊落油煎排骨至兩面金黃，兜起
2. 燒熱油, 落蒜蓉, 薑, 乾蔥片
3. 倒入調味, (因人人口味唔同, 可先自行試味, 如果覺得味道或顏色唔夠, 可再加醋, 片糖或老抽, 煮滾後加入排骨轉為小火，煮至汁濃，完成
琴日做左呢個 ...
" 香濃朱古力茶餅 "
(雖然個名係茶餅, 其實係蛋糕黎架 ...)
可以作為聽日 blog 聚的拌手禮 ....
其實呢個模買左好耐,
係舊年年尾初初學整蛋糕時買
果陣見到有個蛋糕好想做,
見到呢個模好似, 所以買左佢 ...
不過, 買左後先發覺買呢個模唔係好 arm 用呀
所以, 呢個模係未用過架,
今次做呢個茶餅,
就係因為見到有個譜應該可以用佢,
所以就做左呢個 ...
" 香濃朱古力茶餅 "
原本想放原粒榛子 or 原粒杏仁在朱古力餡上
但因為我個模好細, 如果放左 nuts 在朱古力餡上
就遮哂 d 朱古力餡, 所以最後乜都冇放...
食譜 (來自孟老師) :
材料 >
A) 蛋糕體 : 無鹽牛油 105g, 低粉 90g, 糖粉 75g, 粟粉 1.5 茶匙, 杏仁粉 15g, 蛋黃 35g, 牛奶 20g, 雲尼拿香油 0.5茶匙, 朱古力屑 1 大匙
B) 朱古力餡 : 淡忌廉 75g, 朱古力 90g, 鏡面果膠 15g
做法 >
1. 蛋糕體 : 無鹽牛油在室溫軟化, 同時篩入低粉, 糖粉和粟粉, 先用橡皮刮刀稍微拌合
2. 改用電動攪拌機由慢速至快速攪拌均勻, 呈光滑細緻的糊狀
3. 加入杏仁粉, 再分別加入蛋黃, 牛奶及雲尼拿香油, 繼續快攪均勻
4. 刨入朱古力屑, 改用橡皮刮刀以不規則方向輕輕拌呈均勻的麵糊
5. 麵糊裝入唧袋內, 並在袋口剪一小洞口, 將麵糊唧在模內約八分滿
6. 預熱焗爐 180度焗20-25分鐘
7. 朱古力餡 : 淡忌廉用小火煮至50-60度, 熄火後加入朱古力, 用橡皮刮刀攪拌至融化, 接著加入鏡面果膠, 續攪呈均勻的朱古力糊
8. 朱古力糊裝入唧袋內, 並在袋口剪一小洞口, 將朱古力糊直接唧在蛋糕體的 " lup" 位, 待餡料凝固後便可.
Marcus ..... Happy Birthday !!
今日係你 11歲生日喇
媽咪有好多野想寫呀, 不過, 留待下一篇吧 ....
daddy, 媽咪, chloe 祝你 ...
生日快樂 !!
身體健康 !!
日日都開開心心 !!
媽咪之前已經問你想食咩蛋糕,
你同我講想食返媽咪為 daddy 上年生日時做的
"朱古力石板街芝士蛋糕"
媽咪知道你鐘意食芝士蛋糕, 但媽咪想比驚喜你呀 ...
媽咪亦知道你鐘意食芒果,
我就為你做一個 "芒果芝士蛋糕" 啦 ...
不過, 媽咪的功力仲未係好深厚,
只可以做一個簡簡單的生日蛋糕比你,
希望你鐘意 ....
一直都唔比你知我為你做乜野款的生日蛋糕,
但當你見到你的生日蛋糕時, 見你好開心的樣子
我就知你喜歡 ...
你仲同我講多謝媽咪, 個蛋糕好靚, 好好食呀 ...
又鍚左我一啖
見你咁鐘意, 媽咪真係好開心呀 !!
