幫奧比斯做義工 ...

 

 

2009年8月29日 (sat)

 

今日, 我地幫奧比斯做義工 - 賣月餅和吹氣燈籠

地點仍然跟舊年一樣 ... 杏花村地鐵站站口

聯絡人7月聯絡我地時, 我地已經即時答應 ...

聯絡人仲好細心,  佢話 chloe 年紀咁細,

杏花村地鐵站站口係比較理想的地點 ...

今年已經係 marcus 幫奧比斯做第 3 年義工喇,

而我地就係第 2 年 ...

喺呢 3.5 小時中, 我同 chloe 一組, marcus 就自己一組;

(daddy 臨時要去見客, 今日5點幾先黎到)

我地好落力幫手賣月餅 & 燈籠,  

不停同街上嘅人呼籲 :

 "請支持奧比斯, 買個月餅或吹氣燈籠啦,  

幫助有需要嘅人啦.............."

過左一陣, marcus 走過黎話我知,

啱啱有個婆婆幫佢買左個月餅, 仲笑住同佢講

其實我琴日已經買左架喇, 不過見係你, 幫你買一個啦 ...

marcus 個傻豬仲話, 個婆婆好鬼馬呀 ...

( "鬼馬" ... marcus 形容得好好笑  )

至於 chloe, 今年大個左, 亦大膽左 ...

最初果陣, 個傻豬仲係講得唔清楚,

到最後, 佢竟然自己拎住個燈籠同月餅走去同人講 :  

" 請支持奧比斯吖, 一個 30蚊呀 "

如果捐款買吹氣燈籠的話, 佢就會問人 :

"要吹左氣定係唔吹氣呀 ? " (我諗佢係聽我問得多 )

有 d 途人, 見 chloe咁細個就幫手做義工,

都好肯慷慨解囊, 仲一路捐款一路問 chloe : 

你幾多歲呀 ? 熱唔熱呀 ?  攰唔攰呀? ... 等等等等  

又有幾個途人, 我記得有婆婆, 媽咪級 & 姐姐,

原本已經話買左架喇, 但望一望 chloe, 就話 :

 你咁乖嘅, 咁細個就幫手做義工喇, 好啦,

 幫你買多個啦  ...

我地仲見到 chloe 同學仔 mccarly一家,

當然佢地都支持左我地啦 ...

其實今日都好熱, 雖然有 遮頭, 但真係係咁流汗 ...

所以我都有叫 marcus & chloe 去坐下休息下, 飲下水,

當然, chloe 係休息得最多果個啦,

 因為要佢咁細個企 3個半鐘, 跟本就冇可能,

所以佢一同我講好攰好口渴, 我就叫佢坐下, 

到 daddy 黎到後, 我就叫 daddy 帶 chloe 去食少少野,

chloe 返黎後就成個生猛哂, 又再好落力呼籲喇 ....

 

我地今日都賣左幾多燈籠同埋月餅, 總共 60個,

成績都算唔錯 ...

完成左今日的義工工作後, 我地都為善不甘後人,

出力又出錢, 買左燈籠 & 月餅, 幫助有需要嘅人 ....

得到當事人同意下, daddy 影左呢幾張相 ....

臨離開時影嘅相 ....

chloe 今年都有再問我: 義工即係點解呀?要做 d 咩架?

我就再簡單解釋一次比佢聽啦, 冇諗過,

我再問 chloe 我地今日做義工嘅目的時,

 佢都可以講得番7-8成比我知 ...

不過唔緊要啦, 同舊年一樣, 我都係希望chloe 參與下,

灌輸比佢知我地係幫助有需要嘅人 .....

插曲 : 今日有一位好有心嘅人,

佢見到 marcus & chloe 咁落力,

送左一袋零食佢地呀,  真係好多謝呢位有心人 ... 

其實我係唔好意思收的, 不過當時正在工作中,

真係唔想喺度拖拖拉拉,

所以最後我都收左佢呢份愛心禮物 ....

再一次多謝你, marcus & chloe 好開心收到你嘅禮物呀

 

舊年嘅月餅同埋燈籠, marcus 話舊年個燈燈籠可愛 d ..

 

 

ivr