繼續做中式甜品 ...
" 水晶豆沙包 "
材料 : (我只做半份)
生粉, 澄麵 各40克
滾水 1/2 杯 (記得一定要用啱啱煲滾的水)
豆沙餡 120克
生油 1/2 湯匙
做法 :
1) 豆沙分成 20份, 分別搓成球型
2) 生粉及澄麵分別過篩, 沖入滾水立刻伴勻, 焗 5 分鐘, 加入生油搓成粉糰
3) 粉糰分成 20份, 分別包入豆沙餡, 搓成球形成水晶包
4) 將水晶包排放已掃油的碟上蒸 5 分鐘, 關火, 待 1 分鐘才掀蓋, 面掃油即可享用
2010年4月30日 星期五
2010年4月29日 星期四
2010 台北5天遊 - Day 4
2010年4月3日 (冷 + 雨)
今日又係落雨天, 天氣仍然得15度左右
不過就冇琴日咁凍 ...
我地今朝 plan 左去 "台灣科學館"
上網睇資料時, 話地震地帶 & 3d 劇場好值得感受 &睇 ...
可惜唔係想像中咁好玩, 2 個小魔怪都冇乜興趣
仲用左我地一朝時間 tim ...
之後我地就出發去淡水, 途經呢個 " 唭哇岸 " 捷運站
我地一家已經將個站名玩到好好笑 ... 開心原來真係可以好簡單 ...
淡水好多香港人去, 特別係老街, 可能真係好多野食 ...
一邊行一邊食, 有 d d 感覺去左北海道小樽,當然小樽高檔好多 (我係祟日主意者 
蔥油餅 ... 正 !!!!
珍珠包 ... 好好味; 臭豆腐 ... 比九份的好食好多 !!
苦瓜汁, 巨無霸雪糕, 大腸包小腸 ... 好味 !
阿給 & 筒米糕 ... 阿給好食, 不過佢地話麻麻; 筒米糕 ... ok
呢間好值得推介 "黑丸嫩仙草"
chloe 真係好大膽, 佢自己走去同個哥哥落 order
指住個 menu 同哥哥話 " 1號, 1 個; 2號 , 1個 "
chloe 仲係用國語講出黎, 叻 !!
我遲 d 都要試下自己整呢個甜品先 ...
有亞婆鐵蛋, 仲有亞伯鐵蛋 ... 唔知佢地有咩關係呢 ??
開心 daddy & marcus & chloe 入左呢個博物館睇 ...
諗住去情人橋, 點知呢個時候就落大雨,
所以最後我地都冇去到, 下次吧 !!
* * * * *
今日大家都好似好累, 反正 book 左今晚 9:30 食 "馬辣火鍋",
所以返台北時我地先返酒店休息 ...
食飯前去左 "港記酥皇店", 只買左 "總統餅"
冇買到佢嘅鳳梨酥, 因為我覺得"李儀" 好食 d ...
* * * * *
" 馬辣火鍋 ", 火鍋放題, 又係值得推介 ...
除左 chloe 唔食辣之外, 我地個個都食個麻辣湯底
好多野食, 牛肉 (...正), 海鮮, 不同的火鍋料, 好豐富
仲有支裝 coke, sprite, fanta, 忌廉, 打邊爐飲凍嘅
支裝汽水真係好正, 我諗我地每人都飲左幾支
花茶Hagen Das, Movenpick, 好多款的甜品, 生果
全部任食, 真係諗起都開心, 諗起都想飛過去食呀
今晚真係食得太飽, 個胃已經裝唔落其他野喇 ...
第四天完 ... 待續
2010年4月27日 星期二
沒有準備下的 pizza ...
呢 2 日其實都頭痛, 係真係身體唔舒服的頭痛
加上 marcus 的選校表未填好, 想睇多 d 資料先
所以琴晚都冇煮到飯 ...
下午時都諗緊今晚食咩好, marcus 話想食 pizza
我當時淨係諗到都好 wor, 叫外賣, 唔駛煩,
我又有多 d 時間再睇下 d 資料,
但 marcus 話, 想食我整嘅 pizza
我個腦當堂醒起我前幾日曾經見到閒閒整 pizza 時
講過話我都要搵日整架 ...
哈 ~ 我同 marcus 真係心有靈犀 !!
咁好啦, 雖然冇買定材料, 唔緊要,
就用屋企有的存貨整啦, 有粟米粒, 芝士腸 & 菠蘿,
簡簡單單的材料, 但佢地話好好味 ...
今晚 marcus 的選校表終於填好, 個頭都好似冇咁痛
係心理作用 ??
Marcus ... 到你喇 ~~
Marcus ... 到你喇 ~
之前幫 chloe 填完升小一選校表
好似過左冇幾耐, 而家輪到 marcus 填升中一選校表 ...
上星期六已經返左學校開家長會 ...
真係頭痛 ...
因為選校表要填 30間中學
而 marcus 學校都要求我地至少填30間的一半,
最遲要在4月29日前填好交 form
但原來真係好難揀, 有 d 學校個名我連聽都未聽過 ...
所以呢 2 日好乖, 乜都唔攪,
乖乖地喺屋企睇資料,
又同開心 daddy 商量 ...
今晚, 終於都填好喇, 聽日可以交返學校,
不過個 result 都要等到 7月6號先知
而之前 in 左嘅學校, result 都係要同一日先知 ...
黎緊嘅 6月 & 7月就係 chloe & marcus 的放榜日子
一年內玩 2 次, 真係好累 ...
希望一切順利 !!
2010年4月21日 星期三
2010 台北5天遊 - Day 3
2010年 4月2日 (fri) 冷 + 落雨
台灣天氣報告好準 ...
出發前睇過天氣報告, 知道今日天氣會轉冷並落雨 ..
果然, 今朝天氣從 day 1 的 29度跌到今朝的 14度
相差成 15度, 又落雨, 真係幾唔方便, 好彩落下停下咁 ...
今日我地行程都係周圍行下, 食下咁 ...
因為一直對拼布,口金等手作仔有興趣
睇 kelly 本口金書時, 知道永樂市場專賣布
所以今次都 plan 左黎行下 ...
上網 check 過, 喺西門町搭公車 9 號, 好容易去到 ...
一去到真係好興奮, 真係有好多好靚的日本布 & 台灣布賣,
可惜開心 daddy & 2 個小魔怪喺度
我揀布時, 佢地就喺 d 舖頭門口等我, 雖然佢地叫我慢慢揀
但個心都唔係好自在, 唯有揀定一間店舖後揀左幾款布就走 ...
永樂市場附近仲有 d 手工藝店, 好似二嫂的店, 店舖比較日本 feel,
好多靚靚布 & accessories 賣 ...
買完布, 去食 lunch, 但未食 lunch, 開心daddy 已經買左 2 個紅豆餅食 ...
我地去左微風廣場附近的 " Victoria Garden " 食 lunch ...
呢間餐廳係以維多利亞作為主題的餐廳, 地方確係幾靚, 不過食物就一般 ...
張公主椅就係喺度影架喇 ...
食完 lunch 就去左微風廣場行 Hands Tailung, 今次 marcus 特別要求要去行
因為佢有野買, 就係 3 個模型, 一返到酒店就即拆黎砌 ...
Hands Tailung 真係可以行好耐, 我仲喺度見到部電腦車花衣車, 為起港紙 $1300 左右
香港賣好似都要 $3,xxx, 幾想將佢帶返香港, 不過最後都冇咁做 ...
見到 Afternoon Tea 呀, 點解香港冇嘅 ??
之後就由忠孝復興站開始行下, 睇下, 去左 " VVG BonBon " ...
一間一入店內就好似入左糖果童話世界的糖果店 (Bon Bon 即法文糖果的意思)
裡面仲可以比你坐底飲下野, 食下野, 真係唔錯, 主打不同款式的杯子蛋糕,
忍唔住都買了 2 款杯子蛋糕食 ... 佢地 d packing 好靚 ...
一路行一路睇, 大人野, 小朋友野都睇, 行到有 d 肚餓,
就去左 " 鼎泰豐 " 食 tea ...
食飽飽就出發去信義城品, 雨開始越落越大, 經過三越時想買亞黙蛋糕,
但只可保存 3日, 諗住最尾果日先買 ...
今次去城品, 大豐收果個係開心 daddy, 佢話佢要買果 d 書香港同大 6 都唔會有 ...
唔見左張 SD Card, 101 大樓的夜景相都冇喇 ...
( 希望搵得返啦, 我仲有其他相喺裡面架 
去西門町想食 "馬辣火鍋 ", 點知一去到就見到好多好多人喺門口等
個 waiter 話最快都要 10:30, 太夜喇, 點等 ??
最後我地 book 定聽晚, 不過都要 9:30 ...
行返出西門町捷運站, 就去左呢間食 dinner ...
冇諗過, 呢間餐廳 d 食物都好得 wor, 3 個主菜都好味, 特別係個海鮮焗飯
返酒店前, 我地買左 d 宵夜 ...
珍珠奶茶, 燒香腸, 鴨翼, 豬大腸, 生果, 飲品 ...
今日本來 plan左去 Hello Kitty Sweet (係一間 cafe) 食 tea, 不過都係冇去到 ...
第 3 天完, 待續 ...
2010年4月19日 星期一
2010 台北5 天遊 - Day 2 (part 2)
2010年4月1日 (thur) 晴 + 熱
續 2010 台灣之旅 - Day 2 (part 1) ...
離開九份, 我地出發去十分睇布瀑,
聽人講好靚, 但去到我地又唔覺真係好靚
可能係天色唔好, 個天都開始陰喇 ...
有諗過唔入, 因為淨係睇個布瀑, 全家合計都要成 NT 300 ...
入場費 (大人NT80, 小童NT50), 不過一場黎到, 唔入又好似 ...
唔租車, 可以自己坐火車黎, 1 小時一班...
下次再去就唔去十分, 會改去黃金博物園玩淘金 ...
好快影幾張相就走喇,
因為我地要去平溪玩放 "天燈" 許願 ...
一盞天燈最多有4 個顏色, 1個色就 NT100,
NT150 就有 2 個顏色, 如此類推 ...
唔同顏色代表唔同願望, 我地揀左2 個色, 健康, 學業 + 前途
我地個個都有寫到 d 願望上去, 老闆好周到架, 比定 d 4字成語你參考
但有 d 都會己諗嘅, 例如 : 有車有樓, 應該寫埋有地 ...
寫好後就由老闆幫我地點火, 準備放上天 ...
daddy 話 : 望下呢邊影張相先放上天啦 ...
希望願望成真 ...
呢個角度影張相都幾有feel wor ...
呢條火車路軌真係有火車行, 所以放天燈 & 影相都要小心 d ...
上左車先醒起唔記得買個天燈吊飾, 但原來 daddy 已經買左喇 ...
原本 plan 去基隆夜市, 不過最後去左士林夜市, 行下, 睇下,買下同食下 ...
Key 放底我地就走, 不過佢真係好好人, 將我地今日買果 d 野 + 外套全部拎返去酒店
佢話等我地行得舒服 d ...
行過 Birkenstock, 見之前果對人字已經唔係好鐘意, 想買返 basic Madrid,
入到去, 見到有 Disney 版嘅 mikey/minnie, 好鐘意呀 ...
不過要貴成 $2xx, 唔係好捨得買, 最後, 只帶走 Madrid 返香港 ...
因為要除鞋先可以入舖內, chloe 喺短短的時間內真真正正學識綁鞋帶... good !!
睇下喺士林夜市食左咩先 ...
生煎包, 個底好脆口, d 肉好juicy; 燒栗米, 一般;
福州胡椒餅, 唔駛排隊, 好好食, 個餅皮好脆口, 又唔乾, 加埋d 餡, 真係諗起都想食
婆婆買嘅冇餡麻薯, 都唔錯 bor & 大阪燒 ... 婆婆, 我整好食 d wor
冰凍木瓜鮮奶, 正, 咳住都要飲; marcus 就買左1 杯 1公升的冬瓜水, 夠哂清熱氣 ...
豪大大雞排, 大塊又好味; 啱啱炸起時食, 真係好正, 雖然好熱氣, 但都唔理喇
十全排骨, 呢個我地買返酒店食, 雖然已經唔係熱辣辣, 不過味道依然濃郁,
我同婆婆一人一半, marcus 忍唔住食左件排骨;
見到有生果賣, 即買...買左番鬼佬荔枝 & 蓮霧, 2 樣都好清甜 ...
今晚又搞到 11點幾, 睇下綜合節目 (又係好好笑) 就去訓 ...
第 2 天完, 待續 ...
訂閱：
文章 (Atom)