2007年 北海道 + 東京之旅 day 4

2007年7月11日 (晴 + 陰天)

今朝一早起身, 梳洗完之後就去食早餐, 今日我地 check out 喇.....

bye bye Hotel Montery & 札幌 ...... 不過我地會再黎嘅

執好哂行李 check out 後, 我地就行去 mazda 租車場攞車 (我係係 tocoo 網站 租車, 租左 mazda), 好緊張呀, 唔知佢會比咩款車我地呢? 雖然上網 book 車時已經知道係邊款, 但好多網友都話攞車時會有驚喜, 會比架大d嘅車我地........終於

攞左車喇, 係就係大架左, 不過都係放唔落2件大行李, 因為仲有架 bb 車, 所以要放其中一件係後座, 難為左 marcus 坐得辛苦.....好彩放底行李後就可以坐得舒服d....

好快就駛左入 ic......沿途都係郊外, 仲耐唔耐見到有牌寫住"小心有廘" "小心有松鼠" "小心有熊" tim, 不過我地一只都見唔到, 有d失望呀

我地要開始搵景點喇......首先我地用GPS 搵 "菓子工房", 聽d網友話佢地 d cake 好味, 望落山嘅風景亦好靚......

一入個 code, e......搵到 bor, 好開心咁揸車去啦, 去到見到間 shop, 有 cake 賣, 即刻入去坐低啦, 但諗諗下又有d唔似  因為舖內只有1/2張台同埋椅, 又冇人serve 我地, 只有1個著住蛋糕師父制服嘅叔叔係度賣 cake, 但check 返d電話同埋地址又冇錯 bor....

老公話唔緊要啦, 反正都黎到, 就入呢間買d cake 食下啦, 咁又係嘅, 自由行就有呢d樂趣, 可能自己撞下撞下都會搵到d好野.......

d cake 真係唔錯, cheese cake 好味, 仲有d細細件嘅 cake都好味呀

食完仲係門口影左相, um......天氣好好呀, 有陽光, 又有風, 好舒服呀.....

因為冇飲品賣, 我地就行左去附近嘅7-11買野飲, 仲買左粟米同埋腸食 tim 呀

食完 cake 就開始繼續我地要去嘅景點喇.....

我地先去芝士工房 + 冰淇淋工房, 同埋pizza 工房, 佢地係隔離架咋, 不過個 gps 可能唔係好 update, 所以唔可以直接搵到......我地要先搵附近地方, 然後再 search 正確位置, 有d煩, 不過都叫做搵到

係芝士工房, 有只大乳牛, marcus 扮揸牛奶影相呀 係芝士工房裡面有好多芝士可能比你試食架, 我就覺得好濃芝士味, 不過老公同埋 marcus 佢地就覺得麻麻地.....

最後, 只係買左2樽白葡萄/紅葡萄菓汁....

係 pizza 工房出面有露天茶座供應......

  

之後我地當然唔會錯過去冰淇淋工房買雪糕食啦, 我地買左南瓜味, 不過味道就冇係小樽果杯咁好味 lu.....

再輸入map code 去下一個景點 : 葡萄酒工房 (個 gps 又係唔可以直接搵到...)

個天開始轉暗喇, 仲有毛毛雨 tim, 亦都開始覺得凍, 去到葡萄酒工房門口, 未落車已經即刻幫 chloe換番條長褲, 驚佢著住條短群仔會冷親呀.....

原來係葡萄酒工房旁邊有個小型薰衣草園架, 即刻抱左 chloe 上去影倆張相先可惜, 天色暗, 影得麻麻地....

係門口影完相後就上左去葡萄酒工房參觀, 上面有2只假馬仔可以比小朋友騎上去玩架, 我倆個百厭星當然唔會放過呢個機會啦.....

marcus 騎果隻係用木桶做架...

chloe 騎呢隻只係用木做....

玩完馬仔就去試飲喇, d 酒都好好飲 bor, 好香....不過係玻璃關係, 所以冇買返黎香港, 但我地見到有頭先我地係芝士工房買 ge 白葡萄/紅葡萄菓汁賣呀....

去完呢幾個景點都已經4點幾喇......開始要搵民宿 (我 book 左 cottage himawari, d 網友個個都讚...)位置, 怕再夜d搵路麻煩

輸入 GPS, 又係搵唔到, 激c, 唯有搵附近再 search 啦......

老公負責揸車, 我就負責搵下路同埋睇路牌, 但行行下見到 bestom 呀.....聽 bk 媽咪講係一間大型 supermarket, d 貨品多又平, 於是就駛架車入停車場行下先啦

一入到去, 真係好大wor.....好似我以前去歐洲果d supermarket 咁大, 乜都有得賣, 其實即係好似縮細左 ge 百貨公司咁 law....

chloe 一見到 d 麵包就話肚餓, 買左麵包比 chloe後就行左去藥房, 即刻搵 sofina 買買左平時用開嘅防曬 cream, 計落平香港 30% 左右啦, 買左2盒, 每盒仲有美白精華素5ml 送 tim 之後又買左退熱貼, 平一半; 買左 "炭" 洗面膏比老公, 10蚊一支;  老公又買左好似脫苦海咁嘅野, 又係好平

行完藥房部就繼續行喇, 見到有好多小朋友 tee 賣 (有 kitty, 有麵包超人同埋一d日本品牌 tee), 諗住行完哂先返轉頭買, 點知老公行完成個 supermarket 就話要走喇, 因為仲未搵民宿位置呀, 驚入黑搵唔到就麻煩, 老公話聽日再黎過啦.....唯有係咁啦

上車起程搵民宿位置喇....我記得個位置應該係山上嘅, 當我地見到 "町營園" 同埋 "彩香之里" 個路牌就知道 cottage himawari  (cottage himawari 係 d 網友介紹, 我鐘意佢有私人洗手間) 係附近喇, 老公駛左架車上山, 但搵極都搵唔到, 見到有幾個類似嘅民宿但都唔係....

天色開始黑喇, 終於我地停低左架車係某一個民宿門口, 拍門入左去一個好似飯廳嘅地方, e....冇人嘅, 不過就聽到廚房有煮野食聲, 就問下有冇人呀?

有個後生仔走左出黎問我地咩事, 我地就問佢 cottage himawari 確實位置, 佢好好人咁話比我地知轉個彎就會見到架喇.......

我地多謝左佢之後又繼續搵喇, 轉個彎? 明明頭先我地都駛過架車上去搵架 bor, 唔見嘅???? 我地又再行返頭先條路, 但都係搵唔到......有d 咀喪 tim

我地再去返頭先去過嘅民宿, 諗住再問下果個後生仔, 但佢d英文唔係好得, 佢就叫左一個女人出黎幫我地, 個女人又係話轉個頭就見到架喇, 我話佢知我地駛過架車上去架喇, but 只見 "彩香之里" ........ 個女人好熱心咁即刻除左條圍群帶我地出門口指比我地睇, 佢地真係好熱心又好人呀 

我同老公之後都 "啊" 左一聲, 原來 cottage himawari 就係果度, 頭先我地都見到架, 係我話應該唔似, 所以冇駛架車過去咋...... side 左d時間 tim

cottage himawari 有幾棟木屋, 我地入左去食飯果棟, 老闆娘就出黎歡迎我地喇, 好好笑容, 我將我預先 print 出黎嘅 confirmation 比佢睇, 佢就笑住招呼我地去我地 book 左果棟木屋喇....

間木屋係倆層架, 上面係 tatami , 下面係廳同埋洗手間, 好乾淨企理, 一入屋, 對仔囡最開心, 由其係 marcus, 佢即刻走左上上層睇....話比我知 : 媽咪, 係 tatami 黎架, 今次係佢第一次訓 tatami 呀

倆兄妹係木屋內條樓梯影相 :

放底行李後就再去返頭先食飯果間木屋食飯, 原來已經7:00pm 喇....

一入內, 全部都係香港人黎架.....個個都講廣東話有一對夫婦+bb (細過 chloe, 我諗1歲多d 啦), 另外有幾個年青人 (睇佢地都係2x 歲左右啦) 係度硏究聽日嘅行程, 我地點頭打個招呼後就坐底等食喇

dinner 開始喇......個樣唔錯 bor, 影番張相先

味道都唔錯 bor  因為我只幫 chloe 訂左 "宿" , 所以 chloe 係冇 dinner 嘅, 我初初諗住我地3個每人分d比 chloe 就得喇.....但老闆娘好好人, 比左一碗飯同埋橙汁比 chloe, 我地就分左d餸比 chloe, 佢都夠食喇 食飽飯仲有甜品 (今晚食好甜嘅蜜瓜) 同埋 coffee tim....

食飯地方, 好乾淨企理  :

食飽飯我地問老闆可唔可以放煙火, 因為之前我地係小樽買左d, 諗住呢2晚放....但老闆話今晚有 又大風, 唔見議我地玩, marcus 好失望呀....

返去自己果間木屋後, 我地決定再去 bestom, 但唔知點解搵極都搵唔到, 唉......好失望呀, 仲諗住買平 tee tim

之後就返民宿, 準備下聽日嘅行程喇......

註 : - 今晚真係幾凍, 老公話可能得12/13度左右咋.....

    - 因為係郊區, 有 d 路唔平, 當架車行到呢d 地方, 架車就會拋起咁, 但 chloe 同 

   marcus 就猛話 "好玩, 好玩" 呀....好好笑

2007 北海道 + 東京親子之旅嘅遊記內冇 post 哂所有相片出黎 .....

下面 2 條 link (webshots 相簿) 可以睇番哂 d 相  :

http://good-times.webshots.com/album/560006631QLPXMh

http://community.webshots.com/slideshow/560006631QLPXMh?mediaPosition=3