2007年 北海道 + 東京之旅 day 5

2007年7月12日 (陰 + 雨)

今朝6點鐘就起身喇......

不過天氣唔好......又落雨又凍

睇花要有陽光先好加嘛, 真係唔好彩, 希望晏d會有太陽啦....

雖然天氣唔好, 但都黎左, 冇理由留係民宿唔出去, 所以就叫埋老公同埋對仔囡起身, 準備去食早餐同埋出發去我地已經 plan 好嘅景點....

因為仲未夠 7:00am, 所以我地揸車去左富田農場先.......天氣真係好凍下

去到富田農場, 已經見到一片薰衣草, 一片紫色, 好靚, 即刻行埋去影返張相, 但因為真係好大風, 大雨同埋凍, 所以影張相就回程返民宿食左早餐先, 回程時 marcus 係火車頭都影左幾張相.....

民宿老闆娘話今日全日都會落雨........唉, 聽到真係唔開心呀

但都冇辦法啦, 天氣真係預計唔到.....

好,出發喇......

因為仲落緊雨, 所以老公見議去左另一面 (旭川) 嘅四季彩之丘, 果然....天氣真係慢慢好d, 雖然依然暗, 但已經冇咁大雨...

去到四季彩之丘, 有d微雨, 但就好寒下, 落車見到門口有熱粟米賣, 即刻走去買黎食, 都幾甜

食完粟米就開始我地第一個賞花景點喇, 一入去就見到倆個大稻草人, 一男一女, 好得意

沿途都有好多花, 但未係最盛放, 遲多1-2個星期黎, 應該會更靚....

發覺開得最靚嘅都係薰衣草, 一大片紫色, 有深有淺, 真係好靚..... 

chloe 仲話要影d紫色花花呀, 而 marcus 就掛住擺 post 影相

四季彩之丘....有觀光車可以坐, 我地一場黎到, 梗係自己行下好....

既然黎到旭川, 梗係去埋 "旭山動物園" 啦,  marcus 最開心....因為原本未必有時間黎去 "旭山動物園"  架

入左 map code 後就去發 ....... 揸車關係, 好快就到, 雖然落雨, 但仍然見到有好多人黎.....

拍好架車就入去動物園喇, 一入到去, 我地就去食d野先, 因為怕 chloe 凍, 所以叫左碗熱烏冬, 可能凍, 碗熱烏冬又熱騰騰, 覺得好好咪, chloe 仲食左好多

個動物園都好大, 有猩猩, 黑熊, 長頸鹿, 河馬等等......但最開心係去睇左企鵝, 白海獅同埋北極熊

首先講下企鵝, 呢度有3種企鵝, 其中皇帝企鵝真係好大隻.......如果同 marcus 度高, 有幾隻皇帝企鵝嘅高度已經去到 marcus 個膊頭喇 chloe 見到仲有d驚 tim 呀, 因為d 企鵝係走哂出黎架 (雖然都係 住係個範圍內, 但其實係好近我地架, )....

其餘果倆種, 一種就樣衰得黎幾搞笑, 另一種就冇咩特別

之後就去睇北極熊喇 ........ 好大隻呀, 佢仲係我地前面 (好近架咋) 行黎行去呀, 不過係有塊玻璃阻隔住嘅......

最後就去左睇白海獅, 不過唔太興奮....

睇哂想睇嘅動物後就走lu, 其實 "旭山動物員" 都好大, 可以玩耐d, 不過因為落雨, 搞到都冇乜 mood, 仲要離開後先醒起其中有個門口有d好大隻動物型嘅玩具比小朋友騎住行黎行去架, 我諗應該幾好玩, 激c.....不過算啦, 落住雨都可能冇得玩

上左車就出發去果醬園同埋麵包超人館......

由 "旭山動物園" 去麵包超人館都幾遠架, 揸車都要成個幾鐘先到

去到麵包超人館已經見到好多各個人物嘅石像比遊人影相, 我地當然唔放過啦, 加上天色又開始愈來愈暗, 所以都係影左相先

係門口影左相後就去左 果醬工房行下先, 裡面有好多種味道任試.......真係好香好有果肉味, 而且又唔算太甜, 但因為係玻璃樽關係, 所以只買左蜜瓜味......返香港後又係覺得買得少.....

終於入麵包超人館喇, 一入到去, 見到好 colourful, 好多好可愛嘅產品, 唔好話小朋友, 連我都比佢地吸引住呀

麵包超人館有2層, 下面一層賣產品, 樓上就有好多畫, 又有個小畫室比小朋友係度畫畫, chloe 一入去畫室就即刻自己攞顏色筆同埋畫紙畫, 仲唔捨得走 tim...

老公陪 chloe 係畫室, 我同 marcus 就走落一層睇野買野, 真係有好多....有糖果, 小食, 玩具, 衣服, 用品, 真係乜都有, 乜都想買

最後, 買左糖果, 小食, 玩具,  用品, 一大袋就離開去下一個目的地......富田農場

順帶一提....麵包超人館有係有好多香港人架....

終於又黎返富田農場喇, 雖然天氣都係唔好, 天色都暗, 但係比起今朝已經算好左....

一入去已經見到一大片薰衣草田, 有d深色d, 有d淺色d.....真係好靚

見到有薰衣草雪糕呀, 雖然凍, 但都一定要買黎試下....... 真係好好味, 又夠滑, 又有淡淡薰衣草味, 仲有牛奶香味, 好想買多個比自己食呀, 但係天氣凍, 其實食完一個行出室外, 已經覺得心都震哂, 加上比 marcus 同埋 chloe 見到, 佢地一定唔會忍得住, 為免冷親佢地, 都係唔好食喇, 不過真係一路行就一路想買多個黎食 law, 仲比老公笑我好似小朋友呀..... 

行出屋仔再搵下七色花田位置, 都唔難搵 bor, 好快就見到喇, 已經見到好多花喇, 不過d 花未係開得最燦爛, 如果遲多2星期黎, 一定好靚, 加上天色唔好, 真係有小小, 小小失望......

唔緊要啦, 比個籍口我地.......要再黎呀

行完富田農場, 已經6點幾 lu, 又係時間返民宿食晚餐喇......

食完豐富晚餐後, 民宿老闆同我地講, 今晚可以玩煙火喇..... marcus 聽到好開心 老闆仲好細心比個有水嘅水桶我地將玩完嘅煙火放入桶內

雖然天氣凍, 又有d風, 但可能係第一次關係,  marcus 玩煙火就玩得好開心, chloe 雖然冇得自己放, 但佢都笑到卡卡聲, 係咁話好玩呀, 好玩呀......睇見佢地真係玩得好開心

煙火放完.....要開始執返d行李準備聽日食完早餐就要離開喇.....

2007 北海道 + 東京親子之旅嘅遊記內冇 post 哂所有相片出黎 .....

下面 2 條 link (webshots 相簿) 可以睇番哂 d 相  :

http://good-times.webshots.com/album/560006631QLPXMh

http://community.webshots.com/slideshow/560006631QLPXMh?mediaPosition=3